ممبئی، 21/اکتوبر (ایس او نیوز /ایجنسی)حال ہی میں سابق وزیر اور نیشنل کانگریس پارٹی (این سی پی) کے رہنما بابا صدیقی کا ممبئی میں سرعام قتل ہوگیا، جس نے سیاست اور بالی ووڈ میں ہلچل مچادی۔ اس واقعے کے بعد، بابا صدیقی کے بیٹے اور کانگریس رہنما ذیشان صدیقی نے ایک جذباتی ردعمل پیش کیا۔ انہوں نے کہا کہ ان کے والد کے قتل کے بعد، قاتلوں کی توجہ اب ان پر مرکوز ہے، لیکن وہ کسی طرح کی دھمکی سے نہیں ڈرتے۔ ذیشان نے مزید کہا کہ میرے والد کو خاموش کرنے کی کوشش کی گئی، لیکن وہ بھول گئے کہ وہ شیر تھے اور ان کی دہاڑ میرے اندر ہے۔ انہوں نے کہا کہ ان کی لڑائی میری رگوں میں ہے، وہ انصاف کے لیے کھڑے ہوئے، تبدیلی کی خاطر لڑے اور ہمت سے طوفانوں کا مقابلہ کیا۔

ذیشان صدیقی نے یہ باتیں سوشل میڈیا سائٹ 'ایکس' پر کہیں۔ انہوں نے لکھا "میرے والد کا قتل کرنے کے بعد وہ یہ مان کر مجھ پر نظریں گڑائے ہوئے ہیں کہ وہ جیت گئے ہیں۔ انہیں میں بتانا چاہتا ہوں کہ میرے اندر شیر کا خون دوڑتا ہے، میں اب بھی یہاں ہوں، بے خوف اور اٹوٹ… انہوں نے ایک کو مار دیا، لیکن ان کی جگہ پر اب میں اٹھ کھڑا ہوا ہوں۔ یہ لڑائی ابھی ختم نہیں ہوئی ہے۔ آج میں وہیں کھڑا ہوں جہاں وہ کھڑے تھے، زندہ، مستعد اور تیار۔ باندرہ ایسٹ کے میرے لوگوں کے لیے، میں ہمیشہ آپ کے ساتھ ہوں۔"

قابل ذکر ہے کہ سابق وزیر بابا صدیقی کا 12 اکتوبر کی رات ممبئی کے باندرہ علاقے میں ذیشان صدیقی کے دفتر کے پاس تین لوگوں نے گولی مار کر قتل کر دیا تھا۔ پولیس نے اب تک 10 لوگوں کو گرفتار کیا ہے اور خاص شوٹر اور دو مبینہ سازش کرنے والوں کی تلاش کر رہی ہے۔ پولیس نے اس قتل واقعہ کے سلسلے میں کہا تھا کہ اس کے پیچھے کا مقصد ابھی تک پتہ نہیں چل سکا ہے اور لارینس بشنوئی گروہ سے مبینہ تعلق سمیت مختلف زاویوں سے جانچ کی جا رہی ہے۔